31 сакавіка 2022 года ў Доме Культуры ААТ «БелАЗ» у горадзе Жодзіна адбыўся семінар для свяшчэннаслужыцеляў Барысаўскай епархіі «1030-годдзе Праваслаўнай Царквы ў Беларусі: гісторыя і сучаснасць».
Узначаліў прэзідыум Мітрапаліт Мінскі і Заслаўскі Веніямін, Патрыяршы Экзарх усяе Беларусі, кіруючы Барысаўскай епархіяй. У склад прэзідыума ўвайшлі сакратары Барысаўскай епархіі протаіерэй Аляксандр Вербіла і протаіерэй Сергій Башкіраў, а таксама лектар ― старшыня Сінадальнай гістарычнай камісіі Беларускага Экзархата, загадчык кафедры Царкоўнай гісторыі і царкоўна-практычных дысцыплін Мінскай духоўнай семінарыі, кандыдат багаслоўя протаіерэй Аляксандр Раманчук.
Семінар пачаўся з агульнай малітвы, пасля чаго Патрыяршы Экзарх звярнуўся да прысутных з уступным словам, у якім расказаў пра прысвечаныя юбілейнай даце мерапрыемствы, якія будуць праходзіць у Беларускім Экзархаце на працягу 2022 года. Таксама мітрапаліт Веніямін падзякаваў кандыдату гістарычных навук, настаяцелю прыхода храма Мінскай іконы Божай Маці горада Смалявічы іерэю Нікадзіму Пашкову за дапамогу ў арганізацыі і правядзенні сустрэчы.
Далей протаіерэй Аляксандр Раманчук выступіў перад свяшчэннаслужыцелямі з дакладам, у якім расказаў пра распаўсюджванне і зацвярджэнне хрысціянства на беларускіх землях у Х–XIII стагоддзях, існаванне Праваслаўнай Царквы на беларускіх землях у перыяды Вялікага Княства Літоўскага і Рэчы Паспалітай (XIII–XVIII стагоддзі), Расійскай імперыі (канец XVIII – пачатак ХХ стагоддзя) і ХХ – пачатку XXI стагоддзя.
Па завяршэнні лекцыі мітрапаліт Веніямін і протаіерэй Аляксандр Раманчук адказалі на пытанні прысутных.
